O Concello de Lugo presentou este venres as novas actividades de balde dirixidas á mocidade para este verán. A concelleira de Cultura, Turismo, Xuventude e Promoción da Lingua, Carmen Basadre, deu a coñecer esta axenda lúdica enmarcada no programa +Xtí, de prevención de consumo de drogas. A corporación informou asemade da publicación da listaxe de nenas e nenos admitidos nos cursos de educación viaria.
Trátase, en primeiro lugar, de xogos tradicionais interxeracionais, coma o xogo de bólas, buxainas, o xogo da rá, zancos, aro, carreiras de sacos ou o zorriago. “É un xeito de pór en valor e recuperar o patrimonio lúdico espallado por toda a xeografía galega, ao tempo que se ofrece unha alternativa para que participen e interactúen nenos e nenas e maiores”, subliñou a edil.
As actividades comezarán este domingo, 1 de xullo, no Parque de Rosalía de Castro, na contorna dos xogos infantís, e celebraranse todos os domingos ata o 12 de agosto, agás o 29 de xullo. Serán de 18:30 a 20:30 horas e recalarán, por orde, na Praza Maior, nas proximidades do quiosco da música; na Praza Milagrosa, preto da área de xogos da zona da Biblioteca Municipal; en Augas Férreas, na Praza Anxo Fernández Gómez e na Praza Roxa. Xotramu e a Asociación Galega do Xogo Tradicional e Popular serán os encargados de pilotar estas novas actividades, cunha duración de dúas horas.
Os roteiros de sendeirismo na natureza son outras das alternativas. Serán un total de oito e comezarán o 9 de xullo, coa andaina As ribeiras altas, Miño arriba. O calendario de excursións continuará o 11, 16, e 18 de xullo; e o 13, 15, 27 e 29 de agosto. Para participar é preciso insciribrse no Servizo de Información Municipal 010 ou a través do 982-29-73-50, para os de fóra de Lugo. Estas rutas, dirixidas por un biólogo profesional, tamén tratarán os Lagos de Teixeiro, a Insua de Burneiros, o Camiño do Miño, a Ruta dos Mapaches, o río Mera, a Ruta da Agua e o río Rato. O punto de saída é a parada de autobús da rúa Anxo López Pérez, ás 10:00 horas, cunha duración ata as 14:00 horas.
O Concello tamén ofrece dous cursos de formación audiovisual. O primeiro abrangue a iniciación á curtometraxe, do 16 ao 26 de xullo, e o segundo está enfocado á creación, do 30 de xullo ao 20 de agosto. Serán na Casa da Xuventude, e impartiraos Andrés Goteira e Suso López. As inscricións tamén deben formalizarse no 010.
Para as e os amantes da arte urbana, a entidade local ten preparado un obradoiro de hip hop, que consta de 10 sesións, martes e xoves, das 10:00 ás 13:00 horas, do 17 de xullo ao 16 de agosto. Tamén hai unha actividade de grafiti, Lugo Mola. Do día 30 de xullo ao 3 de agosto renovarase o mural da zona de street workout da zona do Parque de Rosalía, e do 4 ao 10 de agosto, o da Praza do Castiñeiro.
Esta actividade tamén leva irmandada a humanización dos espazos xuvenís, como a instalación de iluminación ou a renovación de elementos de xogo, como por exemplo, de aros de canastra.
O tenis de mesa, de luns a vernes, das 10:00 ás 13:00 horas, dende o 1 ao 29 de agosto, nas instalacións de tenis de mesa de Frigsa é outra actividade, que se engade ás anunciadas anteriormente polo Concello, como un taller de tatuaxe, outro para reparar móbiles, ou un obradoiro de comunicación, entre outros.
Publicada a listaxe de admitidos nos cursos de formación viaria para nenos
O Concello de Lugo asemade publicou a listaxe de nenas e nenos admitidos nos cursos de verán de educación viaria que organiza no Parque Infantil de Tráfico (PIT) a Concellería de Educación, que dirixe Manuel Núñez, xunto coa Dirección Xeral de Tráfico. Todas as persoas interesadas poden consultar a lista no taboleiro de anuncios do PIT, na páxina web do Concello e na Xefatura de Tráfico.
Trátase duns cursos, no que nesta edición participarán 105 cativos e cativas entre os 8 a 16 anos, que busca que os rapaces e rapazas adquiran condutas e comportamentos seguros, tanto como peóns como usuarios do transporte público e privado. Así mesmo aprenderán hábitos correctos e seguros tanto en vías urbanas como interurbanas, situacións de tráfico reais, e a importancia da sinalización vertical e horizontal, dos semáforos e do uso do chaleco reflector, o casco ou o cinturón de seguridade, entre outros.
Establécense sete quendas en función da idade dos e das participantes. Tres turnos para nenos e nenas de 8 a 9 anos, dous deles do 9 ao 13 de xullo -un en xornada de mañá e un de tarde-, e outro do 16 ao 20 de xullo. Tamén existen dous turnos para os e as participantes de 10 e 11 anos, do 2 ao 6 de xullo, ofrecendo o Concello ben quenda de mañá ou de tarde; un penúltimo para os cativos e cativas de 12 a 14 anos, do 23 ao 27 de xullo, e un para os e as de 15 e 16 anos, do 16 ao 27 de xullo.
As actividades de mañá, terán lugar de 10:30 a 13:00 horas, e de tarde, de 16:00 a 20:30 horas, e cada grupo, non superior a 15 alumnos, asitirá alomenos durante unha semana seguida, recibindo formación teórica e práctica. A clausura está programada para o 30 de xullo.
Máis información aquí ou no teléfono de atención cidadá de Lugo 010.
