A Policía Local trasladou hoxe á alcaldesa de Lugo o balance das últimas actuacións desenvolvidas en materia de localización e denuncia de vehículos abandonados nas rúas da cidade. En total, dende o mes de decembro levantáronse 24 actas de infracción por este motivo.

O inspector da Xefatura da Policía Local comunicoulle á rexedora que os efectivos da Unidade Territorial de Policía de Barrio e Axentes de Mobilidade detectaran vintecatro casos deste tipo: dezasete turismos e sete furgonetas. Algúns dos vehículos abandonados presentan danos que imposibilitan o desprazamento polos seus propios medios e a maioría carecen de Seguro Obrigatorio, ademais de ter caducada a ITV.

TRÁMITES PARA A RETIRADA DOS COCHES

As actas de infracción remitiranse agora ao órgano competente da Administración Local para que se instrúa o oportuno expediente e se ordene a retirada do vehículo, previo requirimento ao seu titular para advertirlle de que, de non proceder á mesma no prazo establecido, o coche será trasladado a un Centro Autorizado de Tratamento.

Estras tramitacións inícianse se se comproba que o vehículo permanece estacionado no mesmo lugar por un tempo superior a un mes, se presenta desperfectos que lle impiden traslardarse con autonomía, ou se carece das placas de matrícula.

A Policía Local continuará desenvolvendo de forma continuada esta campaña, iniciada xa durante o verán.