O Condado de Pallares volve mirar atrás para recuperar a súa historia. Un ano máis, o Museo Provincial de Lugo acolleu a presentación do Certame de Investigación que leva o nome do antigo condado, presentado o pasado mércores 30 e que neste 2021 vai xa pola súa XV edición.
O obxectivo pasa, un ano máis, por promover a investigación nunha serie de eidos que axuden a botar luz sobre a historia distante do Condado de Pallares, un título nobiliario instaurado polo Fernando VII a comezos do século XIX pero cuxas primeiras trazas de unidade territorial hai que procurar nos días da caída do Imperio Romano.
En calquera caso, o certame recollerá ata o 30 de setembro todos aqueles traballos de investigación que axuden a comprender a historia do Condado, ben sexa dende a perspectiva da linguística, a historia, a arte, a arqueoloxía, a antropoloxía, a etnografía e ou o folclore, etc.
O traballos, apuntan dende a organización, deben ser escritos, á parte de orixinais e inéditos e, por outra banda, estar presentados en lingua galega. Os interesados teñen até o último día do mes de setembro para remitilos remitíndoos por correo certificado, baixo plica, á Casa Reitoral de Ferreira de Pallares, onde ten a súa sede a asociación Asociación de Amigos do Mosteiro de Ferreira de Pallares, que organiza o certame con apoio da Deputación de Lugo e a Xunta de Galicia.
O certame irá culminado cun único premio de 3.000 euros que será outorgado ao autor ou autora da obra que reúna suficientes méritos científicos . O xurado emitirá o seu fallo nun acto que se celebrará o día 6 de novembro. A obra gañadora será publicada. A vicepresidenta da Deputación, Maite Ferreiro, puxo en valor o traballo desenvolvido pola Asociación de Amigos do Mosteiro de Pallares: “Ademais de sacar adiante unha nova edición do certame, nuns meses difíciles para a cultura por mor da situación sanitaria, fixo un esforzo por manter a actividade e por visibilizar e dar traballo as xentes dos sectores ligados a produción cultural”.
