A Consellería de Medio Ambiente e Cambio Climático denegou a construción do parque eólico Navallos, proxectado entre os municipios lucenses de Castroverde e Baralla, e acordou o arquivo definitivo do expediente administrativo aberto para a súa tramitación.
A decisión figura no Diario Oficial de Galicia (DOG), que publica a resolución do pasado 5 de agosto da Dirección Xeral de Enerxías Renovables e Cambio Climático. O proxecto estaba promovido por Enel Green Power España.
A Administración autonómica rexeita tanto a solicitude de autorización administrativa previa como a correspondente autorización para a construción das instalacións. A decisión chega despois de que a Dirección Xeral de Calidade Ambiental formulase unha declaración de impacto ambiental desfavorable para o parque.
Este pronunciamento ambiental impide que o proxecto continúe avanzando polos trámites necesarios para a súa execución e leva á Xunta a dar por concluído o procedemento.
UN EXPEDIENTE INICIADO HAI MÁIS DE QUINCE ANOS
A tramitación do parque eólico remóntase a novembro de 2010, cando Enel Green Power España presentou ante a Administración galega a documentación necesaria para desenvolver o proxecto nos termos municipais de Castroverde e Baralla.
A promotora solicitou daquela a autorización administrativa das instalacións, a aprobación do proxecto de execución, a declaración de utilidade pública e a aprobación do correspondente proxecto sectorial.
Desde aquel momento, o expediente foi sometido aos distintos trámites e informes dos departamentos autonómicos implicados. Finalmente, o resultado da avaliación ambiental determinou a inviabilidade da iniciativa nos termos presentados.
