O portavoz do goberno provincial na Deputación de Lugo, o socialista Álvaro Santos, informou tras a xunta de goberno deste venres da aprobación para “a contratación dos servizos de limpeza, manutención e asistencia básica para a residencia e centro de día no Concello de Pol”.

En concreto, destinarase 1,9 millóns de euros, cos que “se financiarán estas prestacións durante catro anos, sendo a adxudicataria Mensaxeiros pola Paz debido ás mellores ofertas e á redución nos custos pois exime á Deputación do pago do 4 por cento do IVE polo seu obxecto social”.

Santos dixo que entre as “melloras ofertadas destacan as 78 horas mensuais de actividades para os maiores, a atención especializada en áreas como nutrición, respiración, hidratación, hixiene persoal, mobilidade, a prestación de servizos complementarios e gratuítos como sesións mensuais de podoloxía, barbaría ou barbería, menús adaptados por nutricionistas”, concretou.

Ademais, aprobouse, abundou, “iniciar con 35.000 euros o proceso de compra de todo o material de lencería; toallas, babeiros, sábanas, necesarios nos centros de maiores de Pol, Trabada e A Fonsagrada”.

Tamén aproveitou para recriminar que o “Partido Popular non está a ter éxito para a súa xudicialización”. “E se a Xunta concede a PIA da Fonsagrada, teremos todo listo para abrir entre abril e maio as residencias de Trabada, Pol, Ribadeo e A Fonsagrada”, afirmou.

O alcalde de Pol, Liño Rodríguez, que acompañou a Santos na rolda de prensa, agradeceu ao goberno da deputación e ao presidente provincial, Darío Campos, “e aos servizos xurídicos desta casa”.

Así mesmo, apelou a que tiveron, por parte da Deputación e o Concello, que “pelexar” cos “inimigos” para estas infraestruturas, situando como “inimigos” ao “Partido Popular que cos seus votos en Suplusa animaron a un díscolo, Manolo Martínez que no seu desquite e cos seus desquites políticos tentan por todos os medios que, neste caso, non abra a residencia de Pol”, manifestou.

Con todo, sinalou que confía que en maio estea para abrir o devandito centro, que contará con 12 habitacións individuais e 12 dobres. A Deputación achegará por cada maior “ata un máximo de 600 euros”.