A Consellería de Cultura e Turismo adxudicou por máis de 161.628 euros o contrato de reparación, restauración e conservación preventiva do conxunto etnográfico que forman as pallozas de O Cebreiro, no municipio lucense de Pedrafita.

O delegado territorial da Xunta de Galicia en Lugo, José Manuel Balseiro, explicou que a empresa adxudicataria destes traballos, que é Resconsa, dispoñerá agora dun prazo de catro meses para executar as actuacións programadas.

O contrato prevé actuacións nas catro pallozas que forman o conxunto etnográfico -Museo, Couzón, Campelo e Galán-, coa substitución total da palla das súas cubertas en tres delas e parcial na de Couzón, onde se aproveitará aquela que aínda se atope en boas condicións.

Ademáis, o proxecto tamén contempla a reparación das laxas dos accesos, así como melloras na instalación eléctrica e no sistema de iluminación.