O Bloque Nacionalista Galego presentou un sistema de localización das liñas de buses de Lugo “para demostra que é posible, a pesar de que o Concello non foi quen en dous anos”. O voceiro e candidato da fronte, Rubén Arroxo, espetou que “fomos capaces, con 12 teléfonos móbiles de localizar e facer o seguimento de 12 liñas de bus”, probando deste xeito que o retraso da empresa adxudicataria carece de xustificación.
Para a proba de xeolocalización, doce simpatizantes do Bloque circularon durante sesenta minutos polas doce liñas con terminais móbiles conectados. No local da formación centralizaron nun monitor o seguimento, visualizando os itinerarios pola cidade. Demostrada a viabilidade e sinxeleza do sistema, Arroxo lembrou que “dende a adxudicación do contrato, os buses deberían estar funcionando conectados a un Sistema de Axuda á Explotación (SAE) que servira para controlar os percorridos”.
É por iso que considera que “á alcaldesa tería que caerlle a cara de vergoña” por afirmar que o SAE “non se pode poñer en marcha por dificultades técnicas”. A empresa debía ter implantado o sistema en xuño de 2017, como constaba no contrato adxudicado en febreiro do ano anterior, mais hogano segue inoperativo. O SAE, ademais de achegar información en tempo real ao usuario sobre a chegada ás paradas, permite un control exacto das distancias percorridas e o cumprimento dos horarios.