O presidente da Xunta, Alberto Núñez Feijóo, avanzou que o plan quinquenal de produción ecolóxica impulsará, cunha dotación de 50 millóns de euros, a investigación, o desenvolvemento e a innovación nun dos nichos de mercado con maior potencial para o sector primario.

Segundo explicou, o programa contribuirá a mellorar a elaboración e a transformación, pero tamén aspectos de comercialización e promoción, así como para fomentar estudos de investigación e impulsar a vertebración e organización do sector ecolóxico.

En Abadín, acompañado das conselleiras de Medio Rural, Ángeles Vázquez, e do Mar, Rosa Quintana, o xefe do executivo galego remarcou que esta folla de ruta «garantirá» o crecemento sustentable a medio e longo prazo, coa previsión de alcanzar 230 novos contratos até o ano 2021.

Non en balde, na actualidade hai un total de 1.067 operadores certificados, que engloban tanto produtores como elaboradores. O plan aspira, do mesmo xeito, a aumentar en 8.000 o número de hectáreas de superficie certificada de agricultura ecolóxica, ata acadar as 40.000 hectáreas.

O presidente da Xunta avogou por «seguir traballando conxuntamente» para captar novos produtores e ampliar o seu coñecemento, fomentar a cooperación e o asociacionismo, e aumentar as axudas para os custos de certificación.

COMERCIALIZACIÓN

Sobre a comercialización, o plan ten como obxectivo a creación dunha plataforma en liña de compra e venda de materias primas para apoiar os operadores na cadea de distribución de produtos. Tamén comprende internacionalizar e ampliar o coñecemento técnico a través de programas formativos específicos.

No que respecta aos consumidores, o documento recolle a intención de promover o coñecemento dos produtos ecolóxicos entre os consumidores mediante a promoción no mercado interno.

«NON É UNHA MODA PASAXEIRA»

Na súa intervención, Feijóo incidiu en que a produción ecolóxica xa «non é unha moda pasaxeira nin minoritaria», como proban os datos presentados polo sector o pasado ano: os produtos ecolóxicos acadaron un volume de vendas de máis de 59 millóns, un 41,5 por cento máis que en 2016.

Nesta mesma liña, salientou que o prezo do leite de produción ecolóxica é un 40 por cento superior ao prezo do leite de produción estándar; e a superficie dedicada a agricultura ecolóxica aumentou, entre 2015 e 2017, en máis dun 50 por cento, pasando de 20.300 a 32.000 hectáreas.

A comunidade galega é a primeira en explotacións de leite ecolóxico e ocupa o primeiro posto en cabezas de ave de curral de cría ecolóxica; tamén está no segundo posto en produción de ovos deste tipo, ademais de destacar na produción de mexilón ecolóxico.

«Contamos tamén con 20 industrias dedicadas á elaboración de produtos lácteos ecolóxicos; e con 67 industrias de produción de carne ecolóxica, ocupando o terceiro posto no ranking estatal», precisou.

Finalmente, asegurou que o novo plan propón asemade a creación dunha mesa da produción ecolóxica que vertebre a relación do sector coa Administración, con incidencia no apoio á fixación poboacional no rural galego.