Galicia rexistrou varios seísmos de madrugada con epicentro nas localidades de Triacastela, Baralla e Becerreá, un deles de magnitude 3,9. Segundo o 112 Galicia, o Instituto Xeográfico Nacional comunicoulles de madrugada unha serie de movementos sísmicos concentrados nestes municipios da montaña lucense.
Foron, en total, oito episodios ocorridos entre as 3:00 e as 3:15 horas, cunha magnitude que oscilou entre 2,5 e os 3,9 rexistrados en Triacastela. Malia a intensidade dalgúns dos tremores, non se notificaron incidencias relacionadas nin chamadas de particulares aos servizos de emerxencia.
Alén dese 3,9 en Triacastela, o 112 destaca un seísmo de magnitude 3,4 e outros de 3,1, 3,0 e 2,9 na mesma localidade. Pola súa banda, en Becerreá rexistráronse movementos de 3,1 e 2,5, mentres que en Baralla a magnitude foi de 2,5.
