A Policía Local de Lugo detivo a un home acusado de tratar de agredir a unha muller na estación de autobuses despois de protagonizar previamente un altercado cos axentes na Rolda da Muralla. Durante a tarde do luns, a Sala do 092 recibiu varias alertas sobre un individuo que insultaba e ameazaba aos transeúntes. Tras ser identificado por unha patrulla, o home trasladouse á terminal de buses, onde unha muller solicitou auxilio denunciando que o suxeito a seguira e tentara bicala e realizarlle tocamentos sen o seu consentimento. Ao ver chegar aos axentes, o sospeitoso tentou fuxir á carreira, pero foi interceptado e detido de inmediato.
Este arresto non foi o único incidente violento. O pasado venres, os axentes localizaron na rúa San Pedro a outro individuo con actitude agresiva que presuntamente agrediu a un home mentres este tentaba protexer á súa nai, de 85 anos, das molestias que o suxeito estaba a ocasionar. Antes desta agresión, o home xa ameazara a clientes noutros locais e tentara subtraer produtos. No momento da súa identificación, comprobouse que portaba un teléfono móbil que acababa de roubar “ao descoido” noutro establecemento do centro.
SANCIÓNS NA MURALLA E CONTROIS VIARIOS
Noutra orde de cousas, o Grupo Operativo Nocturno identificou a catro mozos que accederon de xeito temerario á zona acordoada da Muralla de Lugo, na rúa do Moucho. Os sancionados retiraron o valado e a cinta policial para entrar na área afectada polo recente desprendemento parcial do muro interior, poñendo en risco a súa integridade física. Foron propostos para sanción por unha infracción da Lei de Seguridade Cidadá.
Finalmente, en materia de seguridade viaria, a Policía Local detectou a varios condutores que circulaban superando as taxas de alcolemia permitidas, con resultados de ata 0,60 mg/l, así como un positivo por cocaína. Ademais, instruíronse dilixencias penais contra un condutor implicado nun accidente de tráfico que tamén conducía baixo os efectos do alcol.
