deputado do BNG no Congreso, Néstor Rego, rexistrou unha serie de iniciativas para reclamar ao Goberno central que impulse de “maneira inmediata” a construción da autovía A-56, que debe unir Lugo e Ourense. Rego remarcou que se trata dunha infraestrutura estratéxica para vertebrar o interior de Galicia e fomentar o desenvolvemento económico de comarcas como A Ulloa, Chantada, Sarria ou Terra de Lemos. Segundo denunciaron os nacionalistas a través dun comunicado, esta vía leva planificada máis de 20 anos e os atrasos acumulados son xa “inxustificables”.
O BNG incidiu en que, na actualidade, a única conexión directa entre ambas as cidades é a N-540, unha estrada que se atopa nun “pésimo estado de conservación”. Aínda que o Executivo anunciou unha reforma integral desta nacional, Rego sinalou que os traballos aínda non finalizaron e moitas zonas seguen nun estado “deplorable”. Para o deputado nacionalista, resulta “inadmisible” que os tramos lucenses da autovía estean paralizados e sen prazos, mentres que en Ourense a maioría da obra segue atrapada en tramitacións indefinidas, coa única excepción da Variante Norte.
UNHA INFRAESTRUCTURA CLAVE PARA O INTERIOR
“O Goberno central debe explicar por que leva máis de dúas décadas sen executar unha infraestrutura clave e por que mantén este abandono especialmente grave na provincia de Lugo“, afirmou Rego. O BNG reclama que se axilicen os trámites e se dote de orzamento real a esta autovía para rematar coa situación de illamento que padecen as comarcas do interior de Galicia.
