O alcalde de Lugo, Miguel Fernández, solicitou unha reunión urxente co presidente da Xunta, Alfonso Rueda, co obxectivo de “analizar e desbloquear” a situación do proxecto do Museo da Romanización no antigo cuartel de San Fernando.
Nun comunicado, o rexedor denunciou que, malia que os orzamentos da Xunta para 2025 incluían 500.000 euros para o museo, a metade dese crédito “foi desviado” pola Consellería de Cultura para outros fins, citando como exemplo o financiamento do programa ‘Bono Emancípate’ (destinado á compra de mobles).
O alcalde lembrou o “compromiso inicial” de 10 millóns de euros adquirido en 2010 e criticou o abandono do proxecto en 2019. Fernández sinalou que, a pesar de que Rueda expresou a súa vontade de retomar a colaboración en 2022, tres anos despois “non hai ningún avance nin garantía de cumprimento. O compromiso é nulo e todo son escusas“.
