O presidente da Deputación de Lugo, José Tomei Roca, percorreu este luns o histórico espazo do Centro Galicia en Buenos Aires, Arxentina, institución que, entre outras cousas, preserva na súa biblioteca máis de 20.000 libros de autores galegos e ten unha das instalacións deportivas máis grandes da capital porteña.
Durante a visita ao centro, fundado en 1979, Tomé Roca, acompañado polo senador lucense César Mogo, enxalzou o espazo como unha “auténtica casa da colectividade en Arxentina” e “símbolo vivo da Galicia universal”. “É emocionante comprobar como, a máis de 10.000 quilómetros da nosa terra, a nosa lingua, a nosa música e as nosas tradicións seguen vivas”, destacou o presidente provincial.
A visita culminou cun acto institucional e un intercambio de agasallos no que José Tomé trasladou, en nome da Deputación, “o agarimo, o respecto e o agradecemento do pobo lucense a todos os galegos e galegas de Arxentina”.
“EXTRAORDINARIO PATRIMONIO ARTÍSTICO”
Ademais da biblioteca con máis de 20.000 volumes, Tomei Roca puido coñecer o “extraordinario patrimonio artístico” e documental que conserva o Centro Galicia, con obras de Castelao, Seoane ou Laxeiro. “Un auténtico tesouro galego”, destacou. Alí, por exemplo, está o cadro orixinal ‘A derradeira lección do mestre’, de Alfonso Daniel R. Castelao, que fixo ao presidente lembrar o sufrimento dunha Galicia que “non se dobregou”.
Finalmente, o mandatario lucense destacou que a conservación desta obra en Buenos Aires é unha mostra do papel insubstituíble da emigración galega que levou traballo, esperanza, e a responsabilidade de “preservar a cultura e a memoria colectiva de Galicia”.
