Mentres os empregados da delegación de Sanidade de Lugo son trasladados ao Hospital Universitario Lucus Augusti (HULA) de xeito provisional, o executivo que preside Alberto Núñez Feijóo terá que informar no Parlamento de Galicia do motivo para a clausura do edificio. O Bloque Nacionalista Galego rexistrou varias preguntas acerca dos informes encargados polo goberno autonómico para comprender a orixe da contaminación que levaba anos causando problemas de saúde entre os traballadores.

En representación da fronte nacionalista, Olalla Rodil preguntará pola suspensión das actividades da delegación de Sanidade en Lugo en decembro de 2018. O enclave, ademais das funcións administrativas correspondentes para o departamento, alberga o Laboratorio de Saúde Pública de Galicia, responsable das análises en programas de vixilancia e control a nivel autonómico. Na actualidade, o persoal está parcialmente transferido no HULA mentres se reforma o inmoble da rúa Montevideo.

A parlamentaria por Lugo explica que o público debe coñecer as razóns polas que o medio cento de empregados sufrían problemas no sistema dixestivo, respiratorios e outras molestias. Esta circunstancia foi detectada hai anos, e denunciada perante a Consellería de Sanidade e, máis recentemente, diante da Inspección de Traballo, que deu o aviso definitivo.

Foi entón, a finais de 2018, cando a Xunta de Galicia encargou a unha empresa especializada a identificación do axente contaminante. O goberno galego creou asemade un gabinete técnico para avaliar no tempo a reforma da delegación de Sanidade, co correcto illamento do Laboratorio. Mais o contido dos estudos non trascendeu ata o de agora, e unicamente se comunicou o plan de reforma no edificio da delegación de Sanidade.