Con anterioridade, este xornal recolleu o periplo de Enrique Doval, o veciño do Coeo que sobreviviu no campo de concentración de Mauthausen. Familiares e amigos afondaron na vida dun home aventureiro e de irreductible sentido do humor, reunidos pola Asociación para a Recuperación da Memoria Histórica, a mesma que iniciou o ciclo sobre os deportados coa exposición Boix, o fotógrafo de Mauthausen. Este martes (ás 20.00 horas) reciben no Vello Cárcere a Benito Bermejo, douto no estudo dos españois vítimas Holocausto.
Dende o día 10 de xaneiro, a outrora prisión lucense alberga a mostra sobre Francesc Boix, quen retratou e axudou a condear a barbarie nazi. A inauguración serviu de homenaxe a todos aqueles republicanos lucenses deportados a campos de exterminio trala Guerra Civil, e concretamente, a Rafael Pardo Vales (do Corgo) e os irmáns Vitorino e Aurelio Díaz Hortas (de Outeiro). Este último foi o único dos tres que saíu con vida de Mauthausen.
O horror que atravesaron, e que Doval rememorou no mesmo campo de concentración, foi retratado por Boix, outro defensor da causa republicana. O discreto traballo fotográfico deste barcelonés afiliado ás xuventudes comunistas, que foi quen de agochar un enorme número de negativos, serviu na posterior condena aos líderes do nazismo durante os procesos de Núremberg, nos que foi testemuña.
Para recuperar a figura de Boix, e nun senso amplo a memoria dos deportados galegos e españois a campos de concentración, a ARMH convoca no Vello Cárcere a Benito Bermejo. Este historiador natural de Salamanca comezou a investigar este triste episodio a raíz da relación con exiliados en París, un traballo que continuou con viaxes por toda Europa para recoller as historias de testemuñas e familiares. Está considerado o maior experto na vida do fotógrafo de Mauthausen.
Por dúas décadas, Bermejo pescudou o destino de nove mil españois deportados a campos de exterminio, sendo o de Mauthausen o máis documentado. Nun traballo descomunal xunto a Sandra Checa, o historiador recupera miles de identidades, incluídas as de impostores, confirmando o periplo vital dos compatriotas que sufriron o Holocausto.
Antes da conferencia de Bermejo, a Asociación realizará unha visita guiada pola exposición sobre Boix, do mesmo xeito que fixeron antes do visionado do documental da Televisión de Galicia Mauthausen, regreso ao campo da morte, realizado por Manuel Torrente.
A xeración que medrou na posguerra
O Vello Cárcere ofrece asemade a exposición de fotografía Río, de María X.Fernández, unha “cartografía emocional imprecisa” da infancia de quen medraron posguerra. Dende a perspectiva artística, trátase dun exercicio de análise das emocións humanas tendo en conta os condicionantes de xénero, clase social e grado de fortuna vital.
Río poderase visitar todos os días da semana ata o 14 de abril, coa particularidade de que os luns só en xornada de mañá, de 11:00 a 14:00 horas. En xornada de tarde, de 17:30 a 20:30 horas os martes, mércores e domingos; de 17:30 a 23:00 horas os xoves e venres, e de 17:30 a 22:30 horas os sábados.
