O pleno ordinario de xuño do Concello de Lugo abriuse este luns coa intervención do tenente de alcalde, Rubén Arroxo, que aproveitou a sesión para anunciar a posta en marcha inmediata dunha serie de medidas destinadas a facer fronte ás altas temperaturas e para reclamar á Xunta investimentos urxentes nas infraestruturas educativas da cidade.
Neste primeiro punto, Arroxo sinalou que, como parte das actuacións previstas, o Cemiterio Municipal deixará de realizar enterramentos entre as 13.00 e as 17.00 horas, co fin de evitar a exposición do persoal e das persoas usuarias ás horas de maior calor. Tamén se modificará o horario de traballo da Brigada Municipal de Vías e Obras, “adaptando as intervencións para garantir a seguridade dos operarios”.
O obxectivo destas medidas é “garantir o benestar do persoal público nos meses de máis calor“, sinalou o dirixente nacionalista. Ademais, anunciou a instalación de vinilos anticalor nas escolas infantís municipais, “unha medida que segue as recomendacións legais e busca evitar a acumulación de calor no interior das aulas, mellorando así as condicións das nenas e nenos”.
No pleno, Arroxo tamén fixo unha chamada á responsabilidade da Xunta para que invista nos centros educativos de Lugo, criticando así a “falta de actuacións” en materia de illamento térmico.
Tamén foron a Pleno dúas mocións socialistas, na primeira reclamaban máis persoal médico en calidade de residentes e de geriatras na área sanitaria de Lugo, A Mariña e Monforte, e na segunda, acordouse requirir á Xunta explicacións sobre a denuncia contra o conselleiro de Mar, Alfonso Villares, por suposta agresión sexual. Solicitarán, por tanto, saber as razóns que levaron a mantelo no seu posto desde febreiro ata xuño a pesar desta denuncia.
Pola contra, non tiveron luz verde o catro propostas do Partido Popular nas que se recollían demandas e compromisos concretos cos barrios de O Castiñeiro, Galegos ou As Saamasas.
