A muller detida en Lugo por negarse a someterse a unha proba de alcolemia arremeteu contra os axentes que a pararon. Na madrugada do 29 de maio, na rúa Monteros Ríos, axentes da unidade de Policía Local observaron a unha muller que circulaba en patinete eléctrico en sentido prohibido. Ao darlle o alto, comprobaron que presentaba “signos evidentes” de atoparse baixo os efectos do alcol, segundo trasladou o corpo policial nunha nota de prensa.
A continuación, a muller tentou abandonar o lugar no patinete, no que foi retida polos axentes. Nese momento arremeteu contra eles e propinou varios golpes a unha das axentes, que necesitou asistencia médica.
Finalmente foi detida por un presunto delito de atentado contra axentes da autoridade, desobediencia e resistencia. Formuláronse, ademais, denuncias administrativas pola negativa á identificación e por negarse a someterse ás probas regulamentariamente establecidas para a detección de alcol.
