O senador por Lugo e coordinador xeral do Partido Popular provincial, José Manuel Balseiro, defenderá o vindeiro luns unha moción na Comisión de Transportes e Mobilidade Sostible en relación co desenvolvemento do proxecto do Corredor Atlántico Ferroviario en Galicia. Nun comunicado, Balseiro lamentou que o Executivo estatal “estea centrado nos seus problemas” en lugar dos problemas da xente e dos territorios.

Precisamente, detallou, as necesidades dos galegos e dos lucenses “non forman parte” da orde do día dos Consellos de Ministros, pero “si o estarán no Senado e no Congreso a iniciativa do PP. É unha obviedade que o Goberno gasta máis tempo en defenderse de casos de corrupción que en sacar adiante os orzamentos xerais do Estado ou de debater os problemas, por exemplo da provincia de Lugo, que corre o risco de descolgarse das grandes autovías ferroviarias europeas e nacionais”, asegurou.