“O futuro está na terra”, así comezou a súa intervención o presidente da Deputación de Lugo, José Tomé Roca, na inauguración do foro organizado pola institución provincial xunto á USC e o grupo O Progreso, co título ‘A túa vocación está na terra: ou teu futuro na enxeñería agrícola e forestal’.
O obxectivo do mesmo, tal e como explicou, é “apoiar, visibilizar e reforzar o proxecto do Campus Terra” ao que definiu como un “campus de excelencia”.
Neste punto, destacou a importancia da formación e a investigación no sector primario, en especial nunha provincia de “forte identidade agrícola e gandeira” como esta, sobre a que dixo “que é a de maior produción láctea do Estado español”.
Así mesmo, Tomé engadiu que durante moito tempo, isto foi así por tradición, por historia, pero que hoxe tamén o é “grazas ao traballo da nosa universidade pública, que investiga, forma e conecta coa realidade produtiva”.
Nesta liña, Tomé, que foi profesor na Escola de Capacitación Agraria, defendeu en primeiro lugar a formación de “profesionais ligados á terra”, así como un futuro no coidado do medio ambiente e na aposta por un modelo sustentable e por unha valorización dos recursos naturais e produtivos do rural.
O presidente sinalou tamén o respaldo da institución provincial á formación. “Somos a Deputación que máis recursos achega á universidade pública de toda España, cun apoio decidido ao Campus Terra. Porque cremos na educación como motor de desenvolvemento, de innovación e de futuro”, reivindicou.
Sobre isto, explicou que “cada euro investido na universidade pública xera entre 4 e 5 euros de retorno para a sociedade”. Tamén puxo en valor a achega de 50.000 euros que destinou para a organización deste primeiro foro especializado.
GRANXA GAYOSO CASTRO
Puxo como exemplo o traballo que está a facer a Deputación xunto ao Campus Terra na Granxa Gayoso Castro de Castro de Rei. “Un proxecto que nos enche de orgullo e tamén unha mostra de como a Deputación sabe, pode e quere abrir as súas portas ao conxunto da sociedade e aos sectores produtivos”, defendeu.
Ademais, no seu discurso lembrou que estas instalacións acollen as prácticas do alumnado da universidade e que as cualificou como “un laboratorio vivo”, que serve tamén para xerar diálogo cos gandeiros e gandeiras da provincia, “mellóranse as razas e conseguimos dar solucións a problemas que ten o sector”.
“Cada proxecto, cada convenio, cada colaboración co campus busca construír ese futuro desde aquí, desde a provincia de Lugo, xerando oportunidades, retendo talento e pondo en valor o noso territorio”, concluíu.
PROGRAMA
A cita contou con diferentes bloques temáticos, o primeiro enfocado ao alumnado. Participaron nesta parte Erika Martínez Carrera, enxeñeira de Montes, directora Xeral de Foresín, consultora, enxeñeira ambiental e primeira muller co título de resinera en Galicia; Fernando Solla-Gullón, enxeñeiro de Montes e xefe de explotacións de Foresga; Ismael Moeda Doval, enxeñeiro agrícola, gandeiro e profesor de Formación Profesional; e Irene Suárez Fernández, enxeñeira agrónoma, directora do Laboratorio Nacional de Sanidade Vexetal de Lugo.
O bloque dedicado ao profesorado estivo dividido en dúas partes, unha relacionada co grao Forestal e de Montes, que contou coas intervencións de María Josefa Lombardero, catedrática de Produción Vexetal e Proxectos de Enxeñaría; Ramón Díaz Varela, profesor titular de Botánica; e César Pérez Cruzado, profesor titular de Produción Vexetal e Proxectos de Enxeñaría. Doutra banda, Cistina Cabaleiro Sobrino, catedrática de Produción Vexetal e Proxectos de Enxeñaría; Tomás Custa García e Javier José Cancela Barrio, profesores titulares de Enxeñaría Agroforestal, interviñeron no apartado de enxeñaría Agrícola e Agronómica.
Despois do bloque onde se deron cita os técnicos Agrícolas, Forestais, Agrónomos e de Montes pechou a cita Rosa Romero, a directora da Escola Politécnica Superior de Enxeñaría (EPS) do Campus Terra.
