Membros da CIG concentráronse este mércores diante do edificio do Instituto Nacional da Seguridade Social de Lugo para denunciar un incremento no número de altas médicas por parte da Inspección médica da Seguridade Social e do Servizo Galego de Saúde (Sergas). O secretario comarcal de CIG Lugo-A Mariña, Antonio Niño Saavedra, explicou que nos últimos meses xa detectaran un aumento paulatino destas baixas, pero que se acrecentaron a final de ano.
Matizou tamén que, aínda que afecta a todos os sectores, naqueles con carga física máis elevada, como a construción, a limpeza no fogar e os coidados dos maiores, “é onde máis se nota porque son onde máis baixas hai”. Explicou tamén o responsable sindical que o obxectivo destas accións é “acurtar as baixas médicas e os longos períodos de recuperación para reducir o absentismo”. Así, cualificou a situación de “persecución indiscriminada e abusiva” aos traballadores “aos que se culpa da súa situación de baixa, cando na maior parte das ocasións son as condicións de traballo en precario e a deficiente atención da sanidade pública as responsables”.
A provincia de Lugo ten unhas condicións especiais, diferentes do resto de Galicia, xa que conta cunha poboación laboral cunha media de idade de 51 anos: “Temos unha poboación laboral envellecida que repercute nun maior número de baixas, e o que queremos é denunciar estas situacións de absoluta inxustiza e de abuso por parte da Inspección”. O responsable da CIG considera que as altas se están dando cun “criterio economicista” e non médico, con casos como altas médicas en persoas non sas, denegación de incapacidades, reticencia a novas baixas ou o non recoñecemento de enfermidades profesionais. “Os que deberían velar pola nosa saúde son os que agora nos poñen nunha situación de indefensión”, concluíu.
