Axentes da Garda Civil detiveron, no marco da Operación Doublev, a un veciño de Cospeito (Lugo) como suposto autor da subtracción dunha retroexcavadora e dun remolque lixeiro de dous eixos.

Segundo informaron fontes da Comandancia, o roubo da retroexcavadora produciuse o pasado 30 de agosto nunha canteira situada no municipio de Vilalba. Tras iniciar as pescudas, a Garda Civil localizou o vehículo escondido nunha zona de difícil acceso nun monte comunal situado na parroquia de Gaibor, en Begonte.

Na mesma operación policial localizouse un remolque lixeiro que fora subtraído na madrugada do pasado 3 de setembro nas obras da autovía A-6, ao seu paso polo municipio de Begonte. Ambos os vehículos están valorados nuns 38.000 euros, e a persoa detida polo roubo pasou a disposición xudicial.