A alcaldesa de Lugo, Paula Alvarellos, trasladou este xoves o seu apoio á plataforma cidadá ‘Lugo… non quere cheiros’, constituída para paralizar o proxecto de instalación dunha planta de biometano na parroquia de Coeses, nos arredores da capital, e manifestou o seu “total rexeitamento” a unha iniciativa industrial que, subliñou, provocaría unha “afectación moi importante” ao “medioambiente” e ao “patrimonio cultural”.
A rexedora lucense fixo pública a súa postura ao termo dunha reunión mantida este xoves en Lugo con máis de 60 integrantes da citada plataforma veciñal, que leva tempo denunciando que a instalación da planta de xestión de residuos orgánicos e biometanización emitirá gases prexudiciais para a saúde, danará espazos naturais protexidos, contaminará os acuíferos e provocará uns cheiros, deducidos da descarga de “25 camións diarios de entrañas animais, peces e restos lácteos”, que afectarán a toda a cidade.
“Hai moitos argumentos para defendernos como Administración e como veciñas e veciños. Lugo está a tentar situarse como unha cidade de turismo sustentable, verde e ecolóxica e esta planta non só afectará á potencialidade do medio rural, senón tamén ao patrimonio cultural porque as obras se farán na contorna de protección de elementos catalogados como a mámoa de Barracón ou o xacemento de Trigás”, indicou Alvarellos.
A alcaldesa, que tamén adiantou que o Goberno local será “especialmente rigoroso na tramitación que lle compete” e que esixirá á Xunta de Galicia “a mesma minuciosidade mostrada con outros proxectos municipais”, lembrou que aínda que o Concello carece de competencias en materia de augas, a Confederación Hidrográfica Miño-Sil xa emitiu no seu día “un informe desfavorable” á mantenta do impacto do proxecto nos acuíferos.
Paula Alvarellos, que fixo un chamamento á cidadanía a secundar a manifestación de protesta convocada pola plataforma para o próximo 27 de setembro, concluíu a súa intervención alertando de que o citado proxecto industrial “danará irremediablemente” unha zona situada a menos de 1,5 quilómetros de distancia do curso do río Miño, que linda precisamente coa Reserva da Biosfera Terras do Miño.
