A estrada provincial LU-P-2408 foi cortada ao tráfico parcialmente tras o afundimento do firme pola crecida do río no termo municipal de Guntín, segundo informaron fontes da Deputación de Lugo. Polo momento pechouse á circulación nun dos carrís da vía e polo outro debe circularse con precaución.

Técnicos da institución provincial desprazáronse á zona para comprobar o estado da estrada e traballan na “valoración das obras necesarias” para reparar os danos, ocasionados polas intensas choivas e a crecida do curso fluvial. Mentres, a estrada LU-P-4103 en Ribas de Sil quedou reaberta ao tráfico a media mañá deste luns, despois das restricións causadas por un derrube de terras provocado polas intensas choivas dos últimos días.

O derrube produciuse este domingo, á altura do quilómetro 12 desta vía, que une San Estevo e Pantón, e pechouse a estrada ao tráfico, habilitándose desvíos alternativos. Con todo, desde a Deputación confirmouse que, a última hora deste domingo xa puido habilitarse un dos carrís, e na mañá deste luns, tras os labores de limpeza, puido restablecerse a circulación por completo.