O pleno tumbou a proposición do goberno local para converter en zona verde a parcela CS-5, sobre a que se ubica o Garañón. Despois, ratificou a moción de urxencia presentada conxuntamente polos cinco partidos que acompañan ao grupo socialista na corporación, que obriga ao Concello a iniciar con medios propios un estudo de alternativas para repoñer a legalidade urbanística da zona co menor custe económico e paisaxístico.
O executivo defendera a medida como “punto de partida” para a reordenación, consideranzo a declaración de zona verde “a opción máis segura”. O concelleiro de Desenvolvemento Sostible, Daniel Piñeiro, pediu “non mesturar” as tres sentenzas ditadas acerca do Garañón, asegurando que os informes técnicos irán incluídos logo dos “trámites necesarios” que o Concello está efectuando, e pedira o voto favorable para non retrasar o procedemento alegando que a eventual modificación do Plan Xeral de Ordenación Municipal (PXOM) tería que volver a pasar polo pleno.
“Manobras dilatorias”
O consenso, porén, foi na contra dos socialistas. A oposición foi contundente co que consideran un anuncio de repercusión unicamente electoral, pola falta de acompañamento técnico-xurídico no documento –unha folla– presentado polo equipo de Lara Méndez. “Vostede ía ser a alcaldesa que tiraría O Garañón”, espetoulle Olga Louzao, de Ciudadanos, quen cualificou a proposta de “carta aos Reis Magos” e acusou á rexedora de querer “ocultar os custes”.
Para Carlos Portomeñe, representante de Alternativa Cidadá de Esquerdas, os socialistas están a efectuar “manobras dilatorias” para chegar ás eleccións “sen o custe político de derrubar as torres”. Cuestionou así mesmo a negociación que a alcaldía levará a cabo co promotor do Garañón, para intercambiar a parcela afectada por outras edificables. “Queren gañar zona verde a cambio de despatrimonializar o Concello”.
“Unha hipoteca para tres xeracións”
“Esta proposta pode matar ao Concello”, advertiu Rubén Arroxo, candidato do Bloque Nacionalista Galego. Valorando a zona verde como a saída ideal, considerou que o anuncio do goberno local “é un titular apetecible e populista”. “Pero, é viable hipotecar a tres xeracións?”. Coincidiu Arroxo con Portomeñe en considerar que o grupo socialista tenta desviar a atención do derrubamento das torres, sen deixar de culpar ao Partido Popular por ser partícipe da construción a través do PXOM de 1991 e o convenio de 2005.
Na formación conservadora din ter a vontade de “protexer a Lugo” da “distopía” do Partido Socialista, reducindo o plan para o Garañón a “outro farol” propio da “histeria das eleccións”. Para o voceiro popular, Antonio Ameijide, as torres seguirán en pé en maio “porque as puxeron os padriños políticos” de Méndez, a quen alertou de que “non hai nada gratis”. “E nós seguiremos vivindo en Lugo despois de maio”.
En Lugonovo amosaron un perfil inquisitivo da man de Víctor Álvarez, quen preguntou que opinan os departamentos de Urbanismo e Intervención da conversión en zona verde. Álvarez dixo que o Concello “volve caer nos mesmos erros”, e pediu coñecer onde están os terreos que o Concello planea intercambiar, as consecuencias sobre outras vivendas e viais da zona, así como o persoal e os prazos que esixiría o procedemento de demolición e recalificación. “O punto de partida é demoler as torres”.
Rexeitado o camiño plantexado dende a alcaldía, o pleno emprazou maioritariamente a que o Concello inicie con medios propios o estudo de alternativas para repoñer a legalidade urbanística, co menor custe para o erario público, maximizando a superficie verde e limitando no posible o impacto visual da edificabilidade resultante, no caso de que exista.
