InicioSociedadeO prazo para solicitar os descontos do programa 'Lugo Termal' abrirá o...

O prazo para solicitar os descontos do programa ‘Lugo Termal’ abrirá o vindeiro martes

Con este programa, a Deputación ofrece descontos nos balnearios de Lugo, Pambre, Guitiriz e Pantón ás persoas maiores de 50 anos da provincia, que poderán acudir a estes establecementos cun acompañante que non teña necesariamente esta idade.

PUBLICADA O

- Advertisement -

A xunta de goberno da Deputación de Lugo aprobou as bases da nova edición do programa ‘Lugo Termal‘, que se poderá solicitar a partir do próximo martes 16 de xaneiro. Así o anunciou a portavoz da institución provincial, Pilar García Porto, que detallou que os interesados deberán cubrir un impreso que sairá no Boletín Oficial da Provincia e que tamén estará dispoñible na web da Deputación. Deberán presentalo en calquera rexistro oficial ou na sede electrónica da institución, xunto coa fotocopia do DNI.

Como novidade, avanzou a portavoz, ‘Lugo Termal’ ascenderá aos 91.000 euros, o que representa unha subida de case un 30 % e contará con máis prazas: “Pasamos de 1.025 a 1.340 prazas, o que supón un 30 % máis, co que superamos a capacidade que ofrece a Xunta para toda Galicia”. Desas prazas, 825 son con estancia e 515, sen estancia.

Con este programa, a Deputación ofrece descontos nos balnearios de Lugo, Pambre, Guitiriz e Pantón ás persoas maiores de 50 anos da provincia, que poderán acudir a estes establecementos cun acompañante que non teña necesariamente esta idade. “Nesta nova edición, a número 12, os beneficiarios terán descontos de entre un 10 e un 20 % en función da modalidade (con estancia ou sen estancia) e tamén, como en anos anteriores, haberá diferentes técnicas e tratamentos a disposición das persoas usuarias”, informou García Porto.

PLAN ESTRATÉXICO DE SUBVENCIÓNS

Ademais, a xunta de goberno tamén aprobou o Plan estratéxico de subvencións para este ano 2024 cunha dotación económica de case 8,4 millóns de euros. “Este é o instrumento que regula a concesión de axudas económicas da Deputación ao conxunto do tecido asociativo da provincia, tanto de carácter nominativo, como de concorrencia competitiva”, explicou a portavoz socialista, que sinalou como obxectivo principal desta ferramenta o de “contribuír ao desenvolvemento de proxectos que impulsen o emprego e os sectores produtivos, o benestar social, o deporte, a cultura ou o turismo, entre outros ámbitos.

FORO EMPRESARIAL

Por outra banda, o presidente da Deputación, José Tomé, xunto ao secretario xeral da Confederación de Empresarios de Lugo (CEL), Jaime López, presentou este venres o ‘Foro para Impulsar o Desenvolvemento Empresarial da Provincia de Lugo’. Unha inciativa que o presidente provincial enmarcou na “colaboración” entre ambas as entidades para “favorecer a actividade económica e a creación de emprego” na provincia.

O encontro terá lugar o próximo 18 de xaneiro a partir das 10.00 horas no Centro do Viño de Monforte de Lemos. “Un foro no que contaremos con relatores de referencia para abordar o que xa se está facendo e os retos de futuro en tres ámbitos: infraestruturas, en canto á creación de polos industriais no rural, e no relativo a proxectos empresariais e o seu impacto demográfico”, explicou. Así mesmo, Jaime López sinalou que Monforte é “o nó loxístico de Galicia” e, nese sentido, destacou a vontade dos empresarios de colaborar co Concello no seu labor de converter a localidade en “un polo de desenvolvemento industrial”.

ÚLTIMAS

Tomé, en reunións con Altri e Ulloa Viva: “Fibras téxtiles si, celulosa non”

O presidente da Deputación de Lugo, José Tomé (PSdeG-PSOE), mantivo este martes dúas reunións con...

Collidos mentres “puenteban” o contador eléctrico dunha vivenda

Axentes da Policía Local de Lugo identificaron a dúas persoas por manipular os cables de...

Reunión de Altri con empresas forestais de Lugo para presentarlles o proxecto de Palas de Rei

Representantes de Greenfiber, formada pola enerxética Greenalia e a multinacional lusa Altri, reuníronse coa...

Dúas persoas faleceron tras chocar a súa furgoneta cun camión de cereal en Begonte

Dúas persoas faleceron este martes en Begonte ao chocar a furgoneta na que viaxaban cun...