A xunta de goberno aprobou este martes a lista de 51 asociacións da provincia que resultaron beneficiarias do Programa para a Dotación e Mellora de Servizos Comunitarios, unha liña de axudas dotada con 300.000 euros, para mellorar o rural a través de diferentes obras.
En concreto, os colectivos poden acometer actuacións como o arranxo de camiños e accesos, rehabilitación de fontes, reparacións en lavadoiros ou sistemas de abastecemento, así como acondicionar locais sociais e comprar de mobiliarios, entre outras obras de humanización e accesibilidade.
Por outra banda, a vicepresidenta do Consello Provincial de Turismo, Pilar García Porto, presidiu a última reunión de 2023 deste ente, onde valorou que a Deputación consolida o seu modelo turístico na provincia con medio centenar de accións este ano. Así, avoga por seguir este modelo “de calidade, sustentable, non masificado e atractivo”.
OUTROS ACTOS
Así mesmo, o presidente da Deputación de Lugo, José Tomé, recibiu este martes ao piloto de motos monfortino Eduardo Igrexas, ao que a institución provincial achegará 15.000 euros en apoio para participar no Rally Dakar 2024, que se celebrará do 5 ao 19 de xaneiro en Arabia Saudita.
Noutra orde de cousas, o presidente provincial inaugurou en San Marcos un taller práctico sobre prevención e xestión de conflitos de interese no campo local, organizado pola Deputación e o Consello de Contas.
