As obras para a ampliación do polígono empresarial das Gándaras en Lugo, que recibirá un investimento da Xunta de 8,5 millóns de euros e contará cunha nova superficie urbanizada de 220.000 metros cadrados con prezos de venda bonificados nun 50%, arrincarán “no primeiro trimestre de 2024”.
Así o asegurou este venres, na súa visita á sede da Asociación de Empresarios do Polígono O Ceao-As Gándaras, a conselleira de Medio Ambiente, Territorio e Vivenda, Ángeles Vázquez, quen explicou que o obxectivo central da Xunta de Galicia é converter Lugo “nun polígono de referencia”.
“As obras empezarán no primeiro trimestre de 2024. Se podemos facelo en febreiro non imos esperar a marzo”, manifestou a conselleira, para acto seguido revelar que á licitación da obra presentáronse “un total de 16 empresas” e que a Xunta “seguirá bonificando o 50%” do prezo de venda do chan industrial.
“Xa se abriron os sobres das empresas que se presentaron para esta obra. No momento en que fagamos a adxudicación definitiva serán os 15-20 días de rigor para asinar o contrato e que comecen as obras”, finalizou Ángeles Vázquez, antes de remarcar a importancia de “pór en valor” unha cidade e un polígono que representan, dixo, “un tractor moi importante” para a economía da provincia.
VIVENDA PÚBLICA
A vicepresidenta segunda da Xunta aproveitou tamén a súa presenza en Lugo para anunciar que as obras para a construción das 158 vivendas públicas proxectadas no barrio lucense de Garabolos “comezarán en 2024” e estarán terminadas, vaticinou, “en dous anos aproximadamente”.
“Lugo é a segunda cidade onde hai máis xente agardando por unha vivenda pública”, explicou a conselleira, quen manifestou a súa preocupación pola situación do lote de 58 vivendas sociais pendentes de construción no barrio do Castiñeiriño. “Aínda non temos noticia algunha dese cambio que se comprometeu o Concello a facer do Castiñeiriño porque parecía que alí non querían vivenda pública. Se seguimos así Lugo vai perder a oportunidade de ter outras 58 vivendas e iso non se pode consentir”, concluíu.
