A Reserva da Biosfera Os Ancares Lucenses e Montes de Cervantes, Navia e Becerrea conseguiu a certificación ‘Destino Turístico Starlight’, unha acreditación que concede durante catro anos a Fundación Starlight –impulsada polo Instituto de Astrofísica de Canarias– que está concibida para protexer mediante diferentes actuacións o ceo nocturno e desenvolver as potencialidades do turismo de estrelas no territorio.
“Este Goberno cre nun turismo baseado nas experiencias, de calidade, sustentable, que xera riqueza e emprego e que aproveita as potencialidades da nosa provincia, como o noso rico patrimonio natural, cultural e paisaxístico”, celebrou a deputada provincial de Réxime Interior, Promocióndel Territorio e Turismo, Pilar García Porto.
Segundo trasladou a Deputación, unha vez conseguida a distinción, o seguinte paso será pór en marcha unha mesa de traballo para abordar as actuacións de carácter astronómico e astroturístico necesarias para adaptar as fontes de luz á actividade de observación das estrelas e impulsar servizos e recursos turísticos especializados.
Entre as condicións de iluminación esixibles para manter este recoñecemento Starlight, as fontes de luz exterior deberán ser con reducida emisión na parte azul do espectro visible e ultravioleta,sempre coa lonxitude de onda por baixo dos 500 nanómetros; evitar sobreiluminar, axustando os niveis segundo as necesidades de uso e características da vía; ou a instalación de sistemas de regulación e control da iluminación a partir de certas horas nas que diminúe a actividade.
