O Partido Popular de Lugo asegurou que “non se pode entender” que o orzamento máis alto da historia da Deputación “repercuta menos” na mellora do día a día dos lucenses. Así o manifestou o portavoz do PP de Lugo, Antonio Ameijide, este martes, xornada na que o goberno provincial presentou leste un proxecto orzamentario de máis de 116 millóns de euros para o ano 2024.
O portavoz popular asegurou que a suma das transferencias correntes (capítulo catro) e das transferencias de capital (capítulo sete) baixan nun 4%, pasando dos 30,4 millóns de 2023 aos 29,1 de 2014, o que, segundo denunciou, tradúcese en que hai 1,2 millóns de euros menos para colaborar cos concellos.
O Grupo Provincial Popular denunciou que o presidente da Deputación, José Tomé, “mentiu” durante a súa comparecencia no Parlamento, o pasado 3 de novembro, cando asegurou que ía aumentar a achega ao Plan Único nun millón de euros. “Na realidade conxélase, manténdose previsiblemente nos 21,5 millóns e desatendendo a proposta dos deputados populares de aumentalo en 6,5”, sinala.
Antonio Ameijide sostivo, ademais, que o mantemento da rede viaria provincial “non é nin unha prioridade nin unha preocupación” para Tomé, que “reduce en 400.000 euros” os fondos destinados para a mellora das estradas provinciais, “a pesar de que as estradas da provincia están en moi mal estado, supondo un risco para a seguridade viaria”.
O PP tamén sinala que no caso das axudas, liñas e programas vinculados coa actividade agrogandeira, forestal e do mar (axudas para o tecido asociativo e as corporacións locais) a redución é “moi drástica”, do 21%, ao baixar o investimento máis de 400.000 euros. Por último, en canto á promoción turística, os populares acusan ao PSOE e ao BNG de conxelar os fondos destinados á difusión da imaxe da provincia, mentres seguen destinando importantes partidas para a promoción e difusión das “carreiras políticas” dos cargos que lles interesan.
