A Deputación de Lugo presentou este martes un proxecto orzamentario de máis de 116 millóns de euros para o ano 2024. Unha partida “realista, útil e profundamente social” enfocada, dixeron, a “promover a actividade económica e o progreso” e “fixar a poboación no rural”.
O presidente da institución, o socialista José Tomé, foi o primeiro en tomar a palabra no acto de presentación e destacou o “peso específico” das políticas sociais, que acapararán unha terceira parte do total dos fondos cun investimento un 3% maior que no exercicio anterior, nos novos orzamentos.
Uns orzamentos, incidiu o líder provincial, “aprobados en tempo e forma” por quinto ano consecutivo, que experimentan unha subida do 5,32% con respecto ao ano en curso e que serán sometidos a debate para a súa aprobación no pleno do próximo 28 de novembro.
Tomé, que manifestou que cunha execución media do 85% do orzamento a Deputación de Lugo sitúase “á cabeza” das administracións provinciais de toda España, insistiu no feito de que “un goberno serio e útil é aquel que cumpre o que promete”. “Facemos ademais o traballo que non fai a Xunta, que non está nin se lle espera”, declarou.
Así mesmo, o presidente da Deputación comprometeu unha partida de 11 millóns de euros para velar polo correcto funcionamento do nove residencias de maiores que operan na provincia e para “seguir avanzando”, explicou, nos outros nove proxectos residenciais programados para 2024.
Tamén trasladou o seu compromiso o líder provincial coas políticas de creación de emprego –ás que destinará catro millóns de euros do orzamento anual– e a educación pública, á que reservará tres millóns da partida do ano próximo.
O plan de cooperación cos concellos, “eixo vertebrador”, recoñeceu Tomei, de todo “o proxecto orzamentario” recibirá unha inxección económica de máis de 21 millóns de euros; mentres que 20 millóns serán destinados á creación de nova obra e a “conservación e mantemento da rede de estradas provinciais”; e algo máis de 11 millóns quedarán reservados para o apoio aos “sectores produtivos” e as “actividades estratéxicas”.
AS ÁREAS DA VICEPRESIDENCIA
Tras a intervención de José Tomé, foi a quenda da comparecencia do vicepresidente da Deputación, o nacionalista Efrén Castro, que deu conta das partidas orzamentarias reservadas para as áreas que xestiona o BNG como parte da coalición de goberno.
Castro, que tamén denunciou o “abandono de funcións da Xunta de Galicia” en materias que son, dixo, da súa competencia, revelou que o gasto destinado á área de Cultura será de algo máis dun millón de euros para a programación de actividades culturais; de 950.000 euros para o apoio ao tecido asociativo da provincia; e de tres millóns de euros reservados para a rede museística.
A área de Deportes, do que a Deputación Provincial é o “principal sostén económico”, manifestou Efrén Castro, recibirá 4,1 millóns dos orzamentos; mentres que algo menos dun millón e medio quedarán reservados para Artesanía e Deseño; e 1,8 millóns para Medio Rural, Mar e Mocidade.
