A Policía Local de Lugo interveu o mércores nun accidente nunha rotonda e detectou que un dos condutores implicados, o que provocara o choque, circulaba ebrio: deu un valor de 0,92 no test de alcoholemia, case o cuádruplo da taxa máxima permitida.
Segundo o parte de incidencias do corpo municipal, o sinistro sucedeu na rúa Industria. Alí, un turismo que estaba detido para entrar nunha rotonda foi golpeado por outro que deu marcha atrás. Unha vez o Equipo de Atestados da Policía Local presentouse no lugar, viu signos evidentes de que o condutor do coche que provocara o golpe atopábase baixo os efectos de bebidas alcohólicas.
Os axentes realizáronlle o correspondente test, no que arroxou un positivo de 0,92 miligramos por litro en aire respirado, cando o máximo permitido é 0,25. Por tanto, a Policía instruíu dilixencias por un delito contra a seguridade viaria na modalidade de xuízo rápido. Ademais, o seu vehículo foi inmobilizado.
CONTROIS DE VELOCIDADE
Ao longo do mércores, 15 de novembro, o corpo municipal despregou un dispositivo especial de tráfico en estradas nas que se detectou un incremento de accidentes de circulación e a velocidade máxima está establecida en 50 quilómetros por hora. Este despregamento permitiu controlar a velocidade dun total de 1.434 coches, dos cales 57 foron denunciados.
