A exposición itinerante integrada por unha selección de máis de 300 pezas que conforman a colección de arte do Parlamento de Galicia poderá visitarse na sede de Afundación de Lugo entre o 9 de novembro de 2023 e o 27 de xaneiro de 2024. A inauguración será ás 19,00 horas.
A exposición, titulada ‘A Nosa Arte’, recala en Lugo despois de estar aberta ao público en Vigo, Ferrol e Ourense nos últimos meses. O Parlamento conta coa colaboración da Xunta e de Afundación para executar este proxecto expositivo, no que tamén participa a Real Academia Galega de Belas Artes Nosa Señora do Rosario.
A mostra está comisariada por tres académicos da institución: a catedrátrica emérita de Historia da arte e arquiveira-bibliotecaria da Academia, María Vitoria Carballo-Calero; e os académicos da sección de Arqueoloxía e Museología Felipe-Senén López Gómez e José Carlos Vale Pérez. O tres foron os encargados de realizar a selección das obras que se mostrarán na exposición. Delas, a maior parte delas percorrerán todas as cidades, mentres que unha cuarta parte irán en función da urbe á que leve a mostra.
A exposición ‘A Nosa Arte’ enmárcase na programación cultural do Parlamento cunha dobre función: dar a coñecer a colección de arte da Cámara e achegar o poder lexislativo galego á cidadanía.
