A alcaldesa de Lugo, Lara Méndez, confirmou este mércores que foi convocada a unha reunión co presidente da Xunta, Alfonso Rueda, para o próximo 22 de novembro e, tras lamentar que o titular do Executivo autonómico “rexeitou” o encontro no Concello, avanzou que acudirá á reunión “coa man tendida, pero esixindo compromisos” coa cidade.
A rexedora socialista lembrou que trasladara unha invitación a Rueda para que acudise “á casa de todos os lucenses, que é o Concello”, onde podería asinar no Libro de Ouro da cidade, pero o presidente galego “rexeitou” ir ao consistorio.
En cambio, convocou á alcaldesa para ese encontro o 22 de novembro e Lara Méndez indicou que irá onde sexa convocada porque “do que se trata é de seguir pondo sobre a mesa as necesidades da cidade”.
Respecto diso, lembrou que se cumpriu hai uns días un ano do anterior encontro entre ambos, tras o que ela manifestou a súa “alegría” por chegar a acordos e concretar proxectos e iniciativas. Con todo, engadiu, un ano despois, “do prometido non houbo nada”.
Lara Méndez sinalou que si houbo entón “boas intencións e declaracións”, pero “se non se materializan en feitos, en orzamentos, de nada vale”.
Por iso, afirmou, acudirá á nova reunión con Alfonso Rueda “para seguir trasladando os problemas e necesidades da cidade”, algún deles demandas históricas, como o Plan Paradai, e advertiu de que o goberno de Lugo quere “máis”, “que se dean prazos, comprométanse orzamentos, materializar e executen”. “Irei coa man tendida, pero esixindo compromisos con Lugo”, sentenciou.
