Axentes da Policía Local de Lugo detiveron a un veciño da cidade, de 27 anos de idade, como presunto autor dun delito de violencia no ámbito familiar. Segundo informaron fontes policiais, os feitos ocorreron na tarde deste luns, cando a sala do 092 recibiu un aviso para acudir a un edificio da Avenida da Coruña, onde unha muller estaba a ser agredida e ameazada polo seu fillo.

Cando os axentes chegaron, a porta do domicilio estaba aberta e, ao acceder ao interior, atopáronse cunha muller ferida, con lesións nun brazo e na boca. A muller explicoulles que o seu fillo se puxo moi agresivo e atacouna e ameazouna, chegando a introducirlle unha pistola na boca, antes de ausentarse da vivenda. Os policías pediron unha ambulancia, que trasladou á vítima ao HULA. Ademais, os funcionarios localizaron no domicilio a arma, unha pistola simulada de bólas de plástico, que foi intervida. Posteriormente, atoparon ao suposto autor dos feitos nas inmediacións da casa dunha familiar, onde foi detido.