A Deputación de Lugo presentou este venres unha nova edición do programa ‘Lugo Termal’, que ofrece descontos para tratamentos termais en balnearios da provincia a maiores de 50 anos, cun aumento no investimento e no número de prazas con respecto a anos anteriores.

Así o anunciou, tras a celebración da Xunta de Goberno, a portavoz da Deputación, Pilar García Porto, quen revelou que o investimento destinado ao novo programa será de 91.000 euros; que se incorporará o balneario de Guitiriz ao catálogo de centros termais no que xa figuraban os de Pantón, Pambre e Lugo; e que o número de prazas ofertadas ascenderá de 1.025 a 1.300.

“O que buscamos é favorecer o benestar e a calidade de vida dos veciños e veciñas da provincia, á vez que impulsamos a actividade económica fomentando o turismo termal”, explicou respecto diso Pilar García Porto.