O Concello de Lugo denunciou este xoves, a través dun comunicado, que os veciños tiveron que “afrontar a cuarta onda de calor” sen a habilitación dunha zona de baño fluvial, xa que está “bloqueada pola Xunta”.

A tenente de alcaldesa, Paula Alvarellos, afeou ao Goberno autonómico “o seu persistente boicot a esta instalación gratuíta que permitiría aos veciños contar cunha alternativa segura para combater as altas temperaturas no Miño”.

“Dispor dunha instalación que cumpra con esta demanda social é unha prioridade deste Goberno, pero a pesar da vontade política e o investimento dedicado a este fin, atopámonos por segundo ano consecutivo coa oposición frontal da Xunta a facer uso da concesión que temos autorizada no río nun claro intento do Goberno autonómico de torpedear a xestión municipal“, dixo a edil.

Paula Alvarellos cualificou de “lamentable” que “o Partido Popular utilice as institucións á súa antollo co único obxectivo de tentar tapar a transformación como urbe que experimenta Lugo e coa que pretendemos adaptarnos as consecuencias do cambio climático”.