O PSdeG-PSOE de Lugo denunciou este venres a “estratexia orquestrada” de Elena Candia, expresidenta da Deputación Provincial lucense e candidata do PP á Alcaldía de Lugo, de “xudicializar” a política para “atacar nos tribunais” aos seus adversarios, e censurou que, a día de hoxe, siga “sen pedir perdón” por entregar “anónimos falsos” á xuíza Pilar de Lara para prexudicar a José Ramón Gómez Besteiro.

Dous meses despois de coñecerse que foi Candia a que remitiu os anónimos que deron lugar a esa “persecución” e aos procesos xudiciais que acabaron arquivados, os socialistas criticaron que “segue escondéndose e sen pedir desculpas por todo o dano político e persoal gravísimo que provocou con inventos”.

Así, o PSOE indicou que non só resultou prexudicado Besteiro, actual Delegado do Goberno en Galicia e que dimitiu en 2016 como secretario xeral do PSdeG polas imputacións, senón tamén a propia Deputación Provincial, os traballadores públicos e a imaxe de Lugo, e destacou que esa actuación “non foi unha acción illada nin casual”, senón que se trata dunha “táctica habitual” de Elena Candia “para sacar rédito electoral”.

“Non dubida en utilizar as institucións para o seu interese partidista e persoal“, sinalaron os socialistas lucenses, que lembraron que Candia chegou a presentar, a título persoal ou usando as siglas do PP, “ata 20 recursos contra a Deputación (presidida por Besteiro) ante instancias xudiciais”, uns recursos que foron “tombados” e cuxo custo foi pagado con fondos públicos.