InicioEconomíaO 90% dos traballadores do metal de Lugo secundan a folga, segundo...

O 90% dos traballadores do metal de Lugo secundan a folga, segundo os sindicatos

Hai un piquete "masivo" no Ceao. O paro para reivindicar maiores salarios nótase tamén en localidades como Monforte, Sarria e Vilalba.

PUBLICADA O

- Advertisement -

Os traballadores do sector do metal da provincia de Lugo secundan este mércores a folga ao 90%, segundo calculan os sindicatos convocantes (CC.OO., UGT e CIG). Deste xeito, os profesionais protagonizan piquetes informativos en polígonos como o que de forma “masiva” se desenvolve no polígono do Ceao, na cidade da Muralla.

O secretario comarcal de CC.OO.-Industria en Lugo, José Luís López, apunta a dúas empresas, Recambios Frain e Recambios Infra, que, asegura, “obrigaron” aos seus empregados a acudir aos centros de traballo. O responsable da primeira está sentado na mesa de negociación para actualizar o convenio colectivo e o outro é “o seu socio”, explica.

E é que a renovación do convenio e a consecución dun salario “xusto”, que recolla o IPC “real” de 2022 e unha cláusula de revisión para os anos seguintes, son as dúas principais demandas das organizacións sindicais, tras ano e medio de conversacións. O piquete do Ceao “non baixa de 500 persoas”, segundo este portavoz, que o cualifica de “masivo” e afirma que “nunca houbo” un destas dimensións en Lugo, nin sequera nunha folga xeral.

Os polígonos do Ceao e As Gándaras concentran, de acordo coas súas estimacións, un 90% do sector na provincia, e en ambos os lugares o seguimento é “do 100%”, exceptuando esas dúas compañías, que, en todo caso, “acabaron pechando” ante a presión do piquete.

Así mesmo, no resto da provincia, o paro nótase en polígonos como o de Monforte, Sarria e Vilalba, aínda que esta última localidade as empresas son do ámbito eólico, polo que a medida ten “menos visibilidade”.

MANIFESTACIÓN “MASIVA”

Os ánimos están “caldeados”, segundo recoñece José Luís López, e ás 12,30 horas haberá unha manifestación polas rúas do Ceao que tamén prevé “masiva“.

O luns tivo lugar a última reunión de mediación, no seo do Consello Galego de Relacións Laborais, pero non houbo avances e por tanto non implicou que se desconvocase a folga, tamén prevista para os días 23 e 25 de maio. En total, os sindicatos calculan que hai uns 7.000 traballadores no sector na provincia, 5.000 do siderometal e outros 2.000 do comercio do metal.

ÚLTIMAS

O BNG insta o Senado a rexeitar o proxecto de Altri tras o “clamor social” manifestado en Palas de Rei

A senadora do BNG, Carme da Silva, defenderá esta semana unha moción no pleno da Cámara...

Tres feridos nun accidente entre un turismo e un camión en Vilalba

Tres persoas resultaron feridas este luns nun accidente de tráfico rexistrado na autovía A-8...

Paula Alvarellos reactiva os contactos co IGVS sobre os proxectos de Casa Torre, Dona Urraca e O Castiñeiro

A alcaldesa de Lugo, Paula Alvarellos, retomou as conversacións co Instituto Galego de Vivenda e Solo para avanzar...

Destinaranse tres millóns de euros ó proxecto de reforma do estadio Anxo Carro

A Xunta de Galicia espera licitar en xaneiro de 2025 a obra de reforma...