Unha muller foi detida en Lugo por axentes da Policía Nacional por agredir cun obxecto de cristal na cara a un home que sofre feridas de gravidade. Segundo informou este xoves a Comisaría Provincial de Lugo, os axentes patrullaban pola zona do suceso cando foron requiridos pola propia vítima xusto despois da agresión.

O incidente produciuse nun local comercial onde dúas mulleres empezaron a increpar ao agredido. Segundo a súa versión, ante a falta de resposta, unha das mulleres asestou un golpe na cara cun obxecto de cristal.

A vítima sufriu cortes profundos na cara e desprazamento do iris, polo que se imputa un delito de lesións graves á autora da agresión, identificada e detida tras a presentación da denuncia en comisaría.