O Concello de Lugo accedeu este venres á parcela que ocupa o Garañón para asinar a acta de reformulo dos traballos de demolición, de maneira que se inicia o prazo de 120 días que a empresa adxudicataria ten para levar a cabo o derrube do inmoble.
Segundo trasladou o Concello nun comunicado, a alcaldesa, Lara Méndez e o edil de Sustentabilidade Urbana, Álvaro Santos, formalizaron este trámite “co que se entende, comeza a verdadeira conta atrás para a desaparición definitiva da construción”.
Méndez sinalou que é un paso para “poder seguir avanzando con firmeza na determinación adoptada de que estes terreos sexan un pulmón verde para a capital” lucense.
A mandataria lucense indicou que “o primeiro paso será a realización dunha serie de labores previos”, entre os que figura un levantamento topográfico que permitirá á empresa organizar e planificar as tarefas, sempre en condicións de seguridade para o ámbito no que se está actuando.
