A Sala do Civil e Penal do Tribunal Superior de Xustiza de Galicia (TSXG) estimou o recurso interposto por un home que fora condenado pola Audiencia Provincial de Lugo a 11 anos de cárcere por abusar sexualmente da filla da súa parella cando a nena tiña 14 anos de idade, e rebaixou a pena ata os 9 anos de prisión.
Na súa resolución, o alto tribunal galego expón que debe aplicarse ao procesado a pena no seu grao mínimo, xa que a sentenza do tribunal provincial non detalla cales son as “circunstancias” que levaron a elevar a dita pena e o motivo polo que a condena imposta é proporcionada cos feitos.
Segundo sinalan os maxistrados, o delito de abusos sexuais a menor está penado con entre 9 e 12 anos de cárcere, e “a imposición da pena por encima do mínimo da metade superior precisa dalgunha argumentación complementaria que permita ao acusado e ás partes coñecer cal é a razón pola que o tribunal optou por unha determinada contía da pena e non por outra, sobre todo se se excedeu en case dous anos o mínimo da pena resultante ao calcular a metade superior”.
A Audiencia Provincial considerou probado que o acusado realizara tocamentos no peito a unha das fillas da súa parella, e introduciulle un dedo na vaxina. Por iso, o condenara a 11 anos de cárcere, e impúxolle a prohibición de achegarse ou comunicarse coa vítima durante 13 anos, a medida de liberdade vixiada durante 10 anos e unha indemnización á menor de 7.000 euros.
