O Concello de Lugo espera que a Xunta de Galicia informe este venres de forma “favorable” en relación ao proxecto municipal para derrubar o edificio do Garañón.
Así o trasladou este xoves en declaracións aos medios a rexedora da cidade, a socialista Lara Méndez, quen explicou que este asunto figura na orde do día da Comisión de Patrimonio Histórico.
“Esperamos que sexa favorable e que, con este último informe podamos materializar o que vimos trasladando desde o Concello, que ten un obxectivo como é derrubar o garañón”, destacou.
DESTACA A “SOLVENCIA” DO CONSISTORIO
Por outra banda, tamén este xoves, a rexedora deu conta da liquidación do orzamento de 2022, que presentou un resultado positivo cunha “execución do 100%”.
Na súa intervención, destacou que a xestión realizada favoreceu conseguir un aforro superior ao cinco millóns de euros e sinalou que a suficiencia do remanente de tesouraría posibilitará sufragar as obras iniciadas sen solicitar préstamos.
Deste xeito, apuntou que o Goberno local mantén a débeda cero desde o ano 2017, pese ao esforzo económico realizado estes anos para atallar a vulnerabilidade social, apoiar ao tecido produtivo e crear novas infraestruturas que melloren a calidade de vida da cidadanía.
“Unhas contas, as de 2022, que se poden definir como saneadas e solventes e que certifican o que vimos defendendo desde o inicio do mandato, a liquidez da Administración local”, afirmou a rexedora.
Méndez, que compareceu acompañada pola tenente de alcaldesa e edil de Gobernación, Paula Alvarellos, e polo interventor municipal, Manuel Vázquez, debullou as conclusións máis significativas do informe de liquidación no que destaca un resultado orzamentario positivo.
“Non só finalizamos o ano con 5,5 millóns de euros (5.495.996 )máis de ingresos que de gastos, senón que tamén conseguimos un aforro neto de 5.060.368, o que apoia a nosa xestión e certifica que, a pesar dos esforzos económicos que se fixeron, temos capacidade suficiente para devolver débeda e continuar realizando investimentos”, afirmou.
