A Fiscalía de Lugo abriu unha investigación tras a denuncia dunha nai sobre a reacción adversa que tivo o seu bebé ante o tratamento con varios corticoides na súa pel.
Fontes do Ministerio Fiscal confirmaron a Europa Press a recepción da denuncia e a apertura da investigación, unha denuncia que foi trasladada aos medios inicialmente a través do Defensor do Paciente.
No escrito remitido aos medios por parte desta nai, explica as diferentes medicacións con corticoide que recibiu o seu fillo e que, ante a falta de solución do problema cutáneo e o malestar do bebé, xunto co agravamento do seu estado de saúde, recorreu a probas médicas no seu país de orixe nas que se detectaron varias alerxias.
A nai deste bebé advertiu da “deterioración” da calidade de vida do neno, que ten problemas de pel visibles e que, explicou a proxenitora, tamén lle afectou ao seu organismo e ao soño. O neno, engade, foi atendido no Hospital Lucus Augusti e nos pediatras do Sergas dun centro de saúde desta mesma cidade.
A nai do neno explica, ademais, que os médicos que lle atenderon custeados por privado faláronlle dun medicamento que, segundo denuncia, foille negado no Sergas por ser “demasiado custoso”.
“Pido encarecidamente que miren o caso do meu fillo, que isto non se repita”, sinala no escrito, no que afirma que hai estudos internacionais contrarios á prescrición de corticoide a menores de tan curta idade.
