Un octoxenario de Lugo, veciño do barrio de Montirón, negou este xoves coñecer ás dúas menores ás que supostamente agrediría sexualmente. O home, R.A.S. de 81 anos, asegurou, no xuízo que arrincou na sección segunda da Audiencia Provincial de Lugo: “Non as coñezo de nada. Non falei nunca con elas”, indicou ante os maxistrados.
A fiscalía pide 19 anos de prisión, 15 por unha agresión sexual continuada a unha das menores e catro anos por abusos sexuais a outra menor. Os feitos producíronse entre os anos 2015 e 2018.
Durante a vista, o home tamén negou ir ao parque, próximo ao seu domicilio, onde captaría ás nenas para logo trasladalas á súa vivenda. “Nunca subín menores á casa”, engadiu.
Antes de entrar en sala, o avogado do octoxenario, Luís Trigo, xustificou que ía pedir a libre absolución do home porque “sempre mantivo que non houbo ningún tipo de actividade impropia de cara ás nenas”.
No xuízo está previsto que declaren as dúas vítimas a porta pechada. A Fiscalía mantén que unha das menores sofre un “trastorno con problemas de autoestima”.
