O Centro de Formación Profesional (CIFP) das Mercedes, en Lugo, traballa en tres proxectos financiados con case 800.000 euros polo Ministerio de Educación e FP.
O delegado do Goberno en Galicia, José Miñones, realizou este luns unha visita ao centro acompañado do seu director, José Expósito López, a alcaldesa de Lugo, Lara Méndez, e a subdelegada do Goberno na provincia, Isabel Rodríguez.
O director concretou que estes “proxectos de innovación” do Ministerio trátanse “dun eólico, outro dunha cámara frigorífica de CO2 e unha aula de emprendimiento actualizada e informatizada”.
Pola súa banda, Lara Méndez destacou ao CIFP As Mercedes como un instituto “de alta calidade, onde se vincula a innovación coas novas tecnoloxías e vaise da man do mundo empresarial”.
“O que queremos é que todo o talento que formamos na nosa cidade, teña capacidade de ter oportunidades laborais en Lugo”, subscribiu a rexedora.
Este centro conta con máis dun milleiro alumnos, “un 40 por cento é de xente que vén de fóra, o que fai de Lugo unha cidade atractiva para vir formarse”, presumiu a alcaldesa.
Mentres tanto, o delegado do Goberno en Galicia incidiu en que As Mercedes converteuse en “un deses centros que aglutina a rede de centros de excelencia de España”.
José Miñones asegurou que o Goberno central “está comprometido coa Formación Profesional” e avanzou que se “seguirá apostando con esa lei de FP e a través de investimento”.
“O ano pasado transferimos 87 millóns para FP en Galicia, estamos cun proxecto para 2023 en toda España de 2.400 millóns de euros”, destacou finalmente.
