A alcaldesa de Lugo, Lara Méndez, avanzou este luns un investimento municipal de 4,7 millóns para mellorar a urbanización e conexións entre Paradai e Sacro Corazón, na contorna da estación intermodal.
A rexedora puxo o foco en que a creación do paso inferior “redundará na permeabilidade transversal urbana”, terminando con “o illamento no que se mantiñan desde hai anos estes dous barrios”, mentres que a urbanización e remodelación do viario e os accesos rodados na zona comprendida entre a Praza Conde Fontao, a rúa Alta e o parque do Sacro Corazón redundarán na seguridade viaria e na fluidez do tráfico, pero tamén “na accesibilidade de todo o enclave e na mellora dos servizos”.
Así, desa parte do proxecto, orzado en 11.687.163 euros, o Concello de Lugo achegará 4.674.865 millóns.
Tras as negociacións mantidas entre o Goberno central e o autonómico para custear o aparcadoiro enterrado das instalacións, apunta o Concello de Lugo, a Administración galega accedeu a sufragar parte do seu importe, “detraendo da partida que ía asignar ás tarefas de acondicionamento da contorna”, uns labores “en cambio, nas que si colaborou en Ourense, nunha porcentaxe do 65%”.
Para o novo paso inferior que conectará ambos os lados da canle ferroviaria e, con relación ao tramo que discorra baixo dominio público ferroviario, Adif outorgará unha concesión administrativa, sen custo, en favor do concello, por un período máximo de 75 anos. A administración local, pola súa banda, terá, entre outros deberes, a conservación e mantemento das infraestruturas resultantes e realizará, igualmente, unha reorganización no transporte urbano para garantir a adecuada conectividade da nova área intermodal.
