O conselleiro do Medio Rural, José González, mantivo unha reunión de traballo co alcalde do municipio lucense de Chantada, Manuel Lorenzo, para coñecer as principais demandas e necesidades dos veciños desta localidade relativas ao agro. Neste senso, segundo destacou a Xunta, abordouse a posibilidade de implementar un polígono agroforestal para gandaría de porcino na parroquia de Sabadelle.
Sobre isto, González sinalou que a implantación deste tipo de polígonos permite pór en produción grandes áreas de terra agroforestal con boa capacidade produtiva que alcanzaron, co paso do tempo, un estado de abandono ou infrautilización, recuperando desta maneira unha actividade agrícola ou forestal na zona.
Agora, destacou a Xunta, tras a visita aos posibles terreos do polígono, o conselleiro acordou co alcalde enviar técnicos da Axencia Galega de Desenvolvemento Rural para estudar a viabilidade do mesmo e poder comezar cos traballos canto antes.
