A Asociación Empresarial de Transportes Río Miño (Aetram) ameaza con paros se o Goberno central non mantén para o próximo ano as axudas de 20 céntimos por litro de carburante.
O presidente da asociación, Diego Arias, sinalou que a axuda “ten que seguir” porque, de non ser así, asegurou que os transportistas terían “un problema” e tomarían “medidas”, xa que “non sería viable”.
Así, explicou que estas medidas pasarían por convocar un paro e mobilizacións. “As axudas de 20 céntimos por litro de gasoil entendemos que deberían de seguir. Imos esperar a ver o que pasa o próximo ano”, manifestou.
PASO POR PEDRAFITA
Ademais, Diego Arias acreditou que os transportistas seguen pasando por Pedrafita, a pesar das recomendacións do Goberno de desviarse pola N-120 en caso de neve tras o afundimento do viaduto do Castro na A-6.
“Estamos a pasar polo pobo. Nalgunhas circunstancias, polo tema de mantemento, temos que utilizar o desvío (habilitado na A-6), pero seguimos pasando por Pedrafita sen problema“, afirmou.
Arias volveu a insistir en que descartan a outra alternativa do Ministerio de utilizar a N-120, a través do Barco de Valdeorras, en caso de malas condicións meteorolóxicas. “Desde o principio dixemos que non iamos pasar. O noso é pasar por Pedrafita“, insistiu.
