O xulgado de instrución número 1 de Lugo decretou a apertura de xuízo oral pola peza principal da operación Pokémon, que sentará despois dunha década da súa apertura ao exteniente de alcalde de Lugo Francisco Liñares e outras dez persoas pola adxudicación do servizo de guindastre municipal na capital luguesa.

O Tribunal Superior de Xustiza de Galicia (TSXG) informou este mércores da decisión do xulgado que instrúe a principal peza, que investiga as supostas irregularidades cometidas na concesión á empresa asturiana Cechalva do servizo de guindastre da cidade de Lugo.

O principal acusado é o exteniente de alcalde de Lugo e expresidente da Confederación Hidrográfica Miño Sil Francisco Liñares, para quen Fiscalía pide unha condena de nove anos e medio de cárcere e 32 anos de inhabilitación por violación de segredos, suborno, prevaricación e branqueo de capitais.

Ademais do exmandatario municipal do PSOE, que se converteu en marzo de 2021 no primeiro condenado por unha causa derivada da Pokémon, están acusadas outras dez persoas para as que se solicitan penas de entre 2 e 8 anos de cárcere.