O viceportavoz do PP de Lugo, Antonio Ameijide, agradeceu á vicepresidenta terceira e ministra para a Transición Ecolóxica, Teresa Ribera, que “promocione Lugo como destino turístico”, pero pídelle que cando acuda á cidade das Murallas “traian investimentos para o concello”.
“O desembarco nos últimos dous meses de ministros de Pedro Sánchez (dúas veces Teresa Ribera, outra José Manuel Albares e Carolina Darias) máis aló de paseos, non achegan nada ao ámbito local”, manifestou Ameijide.
Así, lamentou que a ministra, na súa segunda visita no último mes, “veña cunha man chea de nada e outra cousa de ningunha e nin sequera respondese á petición do goberno local de que subvencione o cambio de contadores da auga”.
Ademais, o PP de Lugo bota “en falta a capacidade reivindicativa e o peso político” de Lara Méndez para reclamar á ministra “unha fórmula para que Lugo consiga os 6 millóns de euros” que o presidente Pedro Sánchez lle denegou” ao concello para o cuartel de San Fernando.
